Hindi pa dumarating ang aking iqama (residence permit dito sa
KSA) ko. Kapag naibigay na sa ito sa akin ay maaari na akong magrequest para sa
pagli leave out ko at bibigyan ako ng housing allowance at transportation
allowance. Makakalaya na ako sa company villa. Bwahaha!
Parang bilanggo kasi kapag nasa company villa, susunduin ng service pag alas
sais y medya ng umaga at ihahatid pauwi tuwing alas kwatro ng hapon. Madalas ay
tatlo lamang kaming inihahatid pauwi ng company bus namin dahil ang mga taga
production ay pinag oovertime.
Ang lagi kong kasabay ay ang dalawang Nepalese tea boys namin.
Sila ang taga timpla at serve ng tsaa o kape at tubig na malamig sa aming
table. Kapag nakita na nila na konti na lamang ang tubig ay automatic na nila
itong kukunin ang baso naming para lagyan ulit. Sosyal ano. Bwahaha!
Pagdating sa villa, madalas ay mag isa lang ako sa flat namin
dahil laging may overtime ang kasama ko. Pansamantala ay dalawa lang kami sa
flat na may tatlong kwarto, isang malaki at wala pang laman na sala, kitchen na
sa sobrang laki ay pwede ka magpa tumbling tumbling at dalawang toilet and
bathroom (tig isa kami dito. Hehehe!)
Dahil madalas akong mag isa ay kung anu ano ang ginagawa ko.
Mag surf sa internet, maglaba kahit konti pa lang ang labahin (may washing
machine na bigay ang company sa bawat flat), magluto (meron din gas stove at
LPG), punuin ng tubig ang ref namin na
15.67 cubic feet at palakihin at gamitin ang aking kanang braso sa pamamagitan
ng……. Bwahaha, wag mag isip ng kabastusan, nag wo walling ako.
Dati ang alam ko lang na walling ay yung ginagawa ng mga
artista sa pelikula, ito yung unti unting napapaupo habang dumudulas ang likod
sa pader (kadalasan ay sa banyo ito ginagawa habang umiiyak ang bida, try mo.
Hehe!). Walling ang tawag sa paglalaro ng tennis kalaban ang pader. Kahit
minsan ay hindi pa ako nakakaranas na manalo dito. Hehehe!
Noong isang Biyernes, dahil rest day ko, mag isa lamang ako sa
flat. At dahil walang kasama ay kung anu anon a naman ang pumasok sa kukote ko,
hanggang sa hindi ko maiwasan na dumaloy sa aking mga mata ang luha. Buti na
lamang at walang nakakita sa akin kasi dami kong nailuha. At ang may
kasalanan?? Ang sibuyas na aking hinihiwa dahil ako ay magluluto ng giniling na
baka.
Walang komento:
Mag-post ng isang Komento